البيتزا ..
من الاطباق المفضلة عند اغلبية سكان العالم صغار كانوا او كبار ..
بالنسبة لي ..
البيتزا كانت شي سحري ولذيذ ايام طفولتي .. كنت اجمع مصروفي بس عشان
اشتريها من المطعم وكان الها طعم مميز
ولذيذ .. سعرها كان غالي بالنسبة لطفلة ولكن كان من الجميل جداً اني
احتفظ بمصروفي علشان بنهاية الأسبوع اكافئ
نفسي بوجبة دافئة ولذيذة افضل
بملايين المرات من اسرافها يومياً على رقائق البطاطا والمشروبات ^_^
لو يدري هالمطعم انّي حبّيت البيتزا بسبب مطعمه شان سماه على اسمي
بوقتها " ليش لا ؟! " ههههههه
ومن وقتها واني صار اسمي الوسطي " ... بيتزا .. " ^_^
أول بيتزا سويتها ..
كانت حق يهالو " أطفال " .. يعني لا عجنت ولا تعبت نفسي كنت اخاف من العجن
لاني كنت طفلة بعدني ما افهم وايد
للطبخ والمخبوزات وبطبيعة الحال ما كنت احب احد يعجن بدالي ولذلك شفت
بكتب الطبخ بيتزا التوست وبيتزا الرول
وبيتزا الخبز " تقولوا هالكتاب الفوه بوقتها علشاني " ههههه
اني كنت اقول ما ابي هالشكل وش هالبيتزا الجاهزة بس عليي احط المكونات
وش هالغش والنفاق بالوصفات وين البيتزا
الحقيقية ؟! طفلة وتتشرط بعد !! ^_^
ومع ذلك سويت وحدة منهم .. " بيتزا الرول " هـا اشوفش
تتشرطين وبعدين تسوين هههههه
بصراحة ..
استانست عليها بوقتها .. " طفلة " وتشوف الدنيا بـ الوان
قوس المطر ^_^ ولكن ما عادت بعدها تكررت هي كانت مرة
وخلاص وبعدين صرت اقول لا لازم اجرب اسوي بيتزا مالي شغل .. ابي اعجن
بنفسي ابي بيتزا حقيقية مو شدي
وتشجّعت وسويت أول بيتزا .. عجن حقيقي وياني تفننت بتزيين البيتزا
تفنن تقولوا قررت اصير " شيف بيتزا " هههه
ولمن جى وقت الخبز .. شان اتوتر خفت تطلعلي بدل البيتزا " صخـر
" ههههه
وعلى فكرة اني بوقتها كنت مسوية البيتزا باحجام صغيرة " طفلة
لازم تشوف كلشي صغير .. وهم شكلي كنت ابيها تكفي
للكل شان يطلعلي قطع وايد .. مو طمع بس حب للبيتزا " ههههه
المهم ..
واستوت البيتزا .. وشان على طول اجرب اول قطعة
" تخيلوا صارت عيوني تلمع زي سفنج بوب من الوناسة " .. كانت
طرية ولذيذة ما دريت اني الطفلة المعجزة ههههه
الله على الذكريات الحلوة يا البيتزا .. شفتي اخلاصي ما نسيتش ^_^
والحين يا Mr.Flash
ردنا للزمن الحاضر ...
من زمان واني ودي اجرب " البيستو " بس كنت أاجل و أاجل لين
قررت هالمرة لازم اجرب طعم البيستو
اكثر البيستو شهرة هو بيستو الريحان واني انسانة ما احب الريحان طعمه
قوي ما استسيغه ولذلك قررت اجرب بيستو
النعناع عوضاً عنه .. وقررت الا اجربه بالبيتزا ..
وسويت البيستو وعلى طول قلت ابي اجرب الطعم قبل ما اقلبها هـمْ وقت
البيتزا .. وطلع البيستو ع الذوق كأنه زعتر
تماماً ..
استانست ان ما خذلني الطعم وقررت اكمل المهمة واسوي البيتزا ..
ما كان لي مزاج اقاتل العجين .. فقررت استعمل الخلاط ... وتركت
العجينة ترتاح لـ ساعة تقريباً تالي قسمتها لـ نصين
عجينة خليتها بصلصة الطماطم × عجينة بصلصة البيستو
" ممكن ما تعجبني واروح على نفسي متعة تذوق البيتزا " ادري
بتقولوا " ذكـية " ... شكـراً هههههه
والحشو .. نباتي ما احب بيتزا اللحوم وهالشغلات بيتزتي دايماً
خُضـارية " طماطم ، زيتون ، ومو دايماً احط فليفلة " هو
على
المزاج يعني بتخرب ؟!
المهم ..
وقت تذوق البيتزا قد حـان ...
مالها داعي اقولكم عن اول بيتزا اللي بصلصة الطماطم .. اكيد
لذيذة وش المميز فيها " غبار من ذهب
يعني " !! هههه
بيتزا البيستو ..
حكـاية ثانية .. لذة لا متناهية من الطعم المميز " ما اقدر اقول
الا اني حبيتها اكثر من البيتزا العادية "
شكلي بسمي روحي " أم البيتزا " هههههه
For The English Language … See Below
Pesto Pizza
المكونات :
عجينة بيتزا منزلية الصنع
بيستو النعناع :
2 كوب نعناع طازج
عصير نص ليمونة
4 ملعقة كبيرة جبن بارميزان ، مبشور
نص كوب زيت الزيتون
ملح بحر ، فلفل أسود " حسب الذوق "
الحشو :
شرائح طماطم
جبن موزريلا
ملح ، فلفل أسود
التحضير :
بيستو النعناع :
1/ بمحضرة الطعام ، نخلط جميع المكونات ما عدا زيت الزيتون
2/ نسكب زيت الزيتون بالتدريج للحصول على الاتساق المطلوب
بيتزا البيستو :
1/ بعد تحضير عجينة البيتزا وتركها لترتاح ، نرقها للسُمك المرغوب
2/ ننشر البيستو على العجين ، ثم نرش جبن الموزريلا ، شرائح الطماطم ،
الملح والفلفل الأسود
3/ نسخن الفرن بدرجة حرارة متوسطة
4/ نخبز البيتزا لـ 10 – 12 دقيقة ثم
تقدم
Pesto
Pizza
Ingredients
:
For
pizza :
Homemade
pizza dough
Mozzarella
cheese
Tomato
slices
Salt
and pepper
For
Mint Pest :
2
cups fresh mint
Juice
of 1/2 lemon
4
Tablespoons parmesan cheese , grated
1/2
cup olive oil
Sea
salt , black pepper to taste
Preparation
:
Mint
Pesto
1/In
a food processor, combine all
ingredients until get desired consistency
Pesto
Pizza :
1/
roll out the dough
2/
spread the pesto on top , sprinkle the cheese , then arrange tomato slices
3/
sprinkle with salt and pepper
4/
preheat oven and bake for 10 – 12 minutes
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.