لأني " الأفضل أستحق الأفضل "
هـا الشعار قررت امضي فيه من الآن فصاعداً ..
طوال السنين اللي مضت كنت اسوي كيكات أعياد الميلاد لأختي وأخوي
وآخرين .. بس ولا مرة فكرت بنفسي !!
وحقيقة ولا مرة احتفلت بعيد ميلادي .. كنت خلال هالسنين اشوف ان ماله
داعي و كنت اقول وش المميز يعني في أعياد
الميلاد ؟! وليش ها الضجيج بخصوصه !!
بس ها السنة قررت ان انسى كل هالكلام واسوي عيد ميلاد " أي نعم
" هم اني من حقي احتفل بنفسي ..
صراحة ما حبيت اتراجع عن الشعار السابق ذكره ولا عن فكرة عيد الميلاد
وقررت انفذ الأمر ..
وبناء على كل ما سبق تم تقرير الآتي ..
بما ان عيد ميلادي طاف وبوقتها ما فكرت بالأمر .. قررت اسوي عيد
الميلاد بوقت اللي يجي على بالي
ولذلك فكرت بتفكير عكسي ..
الكيكة .. فجأة خطر على بالي اسويها بالشوكولا " واللي يعرفني
يعرف اني مو فتاة الشوكولا " والشوكولا أسفل
اهتماماتي ولكن كما قلت " كل ما يختص بقرار عيد الميلاد كان عكسي
"
الكريما .. كريما الزبدة بالفول السوداني " احساسي كان يقول راح
تكون مناسبة جداً للشوكولا " وحقيقة هم جداً مناسبين
لبعضهم ..
الشكل .. خطر على بالي شي مرعب
" لا تسيئوا فهمي .. اني ضد الرعب من اساس "
اني اساساً ما شوف شي مرعب وضد الأفلام المرعبة .. اني حتى اذكر ان
آخر مرة شاهدت شي مرعب وتوبة بعد ما
الصغير ما شاهدته .. وهذا
الكلام من سنين مضت ...
على كلا وكما قلت " تفكير عكسي "
الشخصية اللي جت على بالي لكيكة ميلادي " No
Face " هـا الروح المخيفة واللي ما ابي اتخيل
اني اصادفها واني بالشارع ..
تخيلوا لو تطلعوا الشارع ويكون ليل وتتلفتوا يمين وشمال تبون تمرون
الشارع مثلاً وفجأة يجي أحد من وراكم ويقولكم
كم الساعة " وتدوروا فجأة " وتالي تتمسون بها الشكل ..
ما اتخيل اعيش بوقتها وايد ... هههههه
المهم ..
كنت محتارة كيف أطلع الشكل وكم ممكن يوصل طول الكيكة وكم كيكة بحتاج
لعمل المجسم ؟!
قررت اسوي كيكة شوكولا ما عمري نفذتها من قبل وكانت نسبة كمية السكر
فيها تقريبا 4 كوب سكر ؟!
وانتوا صرتوا تعرفوني " الموازنة بالسكر " من ضمن اهتماماتي
..
قررت بدون تفكير اقلل كمية السكر لـ 3 أرباع الكوب وللحقيقة كان قرار
خاطئ لأن ما حسبت ببالي سالفة نسبة الكاكاو
بالوصفة وهذا اللي بالنهاية خيب ظني " مبدئياً " بالكيكة الشوكولاتية ..
طبعاً توقعت ان الكيكة راح
تعطيني على الأقل 3 قطع دائرية بحجم 15 سم تقريباً ولكن للأسف ما حصلت عليه كان
فقط دائرتين .. وهذا اللي خلاني انتقل للخطة " B "
ارجع اسوي كيكة شوكلا ثانية حتى اكمل بناء المجسم .. ولأن الكيكة خيبت
ظني بالطعم المر شوي قررت اسوي كيكة
شوكولا ثانية سبق وسويتها ومناسبة جداً للذوق ربما لاحتوائها على
السكر الأسمر بدلاً عن السكر الأبيض !
على كلاً ..
كمية الكيكة الثانية ضاعفتها حتى تعطيني 1 كيكة دائرية بحجم 15 سم و
كيكة أخرى بشكل نص دائرة ..
وهكذا تم حل مشكلة بناء المجسم ..
ثم باشرت بتحضير الكريما .. ولكن حسيتها شوي متماسكة وغير قابلة للنشر
على الكيكة فكان قراري اضافت القليل من
الحليب أو الكريما للوصول للاتساق المطلوب .. وتمت المهمة ..
بناء المجسم وتغطيته ..
تم وضع الطبقات الكيكية ونشر الكريما بين طبقة وأخرى إلى أن وصلت
للكيكة النص دائرية .. بدا التوتر واضح علي
أول مرة احاول نشر كريما على شي نص كروي " خفت لا يروح الشغل
واتحول لـ دراكولا " بس الحمد لله تم انهاء
مهمة نشر الكريما بنجاح تام ...
" يـا لفرحتي " ^_^
بعد ذلك ..
مباشرة نقلت الكيكة للبراد حتى تتمساك وتجمد التغطية وتكون عملية نشر
الفوندنت على الكيكة سهلة فيما بعد ..
وقت الـ فوندنت " ..
مسكين اللي يفكر يمر على المطبخ بها الوقت .. يا هو بـ يشوف عن جد
الرعب الحقيقي
اني وقت الفوندنت اتحول للشخصية المرعبة واللي ما اتمنى احد يتقابل
معاها ابداً هههههه
أول شي وابسط الحلول عندي بتكون كالتالي ..
أول ما بيمر على المطبخ بحاول قدر الامكان اتفادى عصبيتي واقوله
" لو سمحت عجّل بالطلعة
من المطبخ " وطبعاً التعابير كلش ما تبين انّي معصبة " هذا أول الأمر ..
تالي اذا ما حد مشى مع اللطف اتحول للتالي ..
اوهو .. ولا أخير يعني الواحد ما يعرف يشوف شغله ما تعرفوا تتركوا الواحد
بحاله وش هالحالة هذي ؟!
وطبعاً التعابير
" ودي اتحول واسوي مثل ما تشوفون "
وبعد ما يصفالي المطبخ والهدوء
" شان زين بعد اشتغل بهدوء "
ما زلت معصبة ومتوترة هههههه
ويا هو الفوندنت يمديه ينشف من كثر المـد بالشوبك .. ليمتى عاد ما ادري !!
وتالي شوفوني واني احاول اغطي الكيكة بالفوندنت وفجأة شوية يصير فيه
تبطبط .. لا عاد وش هالحظ ما تصير الا ليي
؟!
وشوية دموع " اتحول لـ ياهلة " " طفلة " وتالي
احاول قدر الامكان انشف دموعي وابلع عصبيتي ويمشي الحال
وساعتها ابتسم ويا أرض احرسي ما عليكي وهالكلام ههههه
لما انهيت المهمة ..
شعرت براحة لا توصف ..
" لأول مرة اسوي كيكة ميلاد لنفسي واشعر بها الكم الكبير من
الهدوء بعد العصبية وتبهدل خلق الله وياي " ههههه
مباشرة رضيت عن النتيجة رغم وجود شوية طعجات يمكن لأن الكيكة تخصني !!
لأن لو كانت لغيري وشفت هالتطعج ما رضيت عنها حتى لو صاحب الكيكة رضى
بها ... ^_^
تركت الكيكة على طاولة المطبخ واني اناظر فيها من زود الوناسة .. تالي
قررت انظف اللي سويته من سكر والوان
وفجأة واني ابحث عن علبة كبيرة احفظ فيها هالكيكة المرعبة الا واني
اشعر عن جد بالرعب من الكيكة ما ادري حسيتها
فعلاً مرعبة لدرجة حبيت اتركها في المطبخ واهرب هههههه
هالشعور صاد كل من شافها ..
" حسيت وقتها اني فعلاً وصلت الكيكة للمضمون المرعب بدل المضمون
الـkawaii " "
وهذا اللي اردته من البداية
" فكرة الرعب لا المرح " ^_^
وعلى فكرة الكيكة جداً ثقيلة بدرجة اني نفسي ما تخيلتها ..
وقت تذوق الكيكة المرعبة ..
لذيذة جداً جداً رغم وجود نوعين من الكيك الشوكولاتي " أحدهما
كما قلت مُـرّة وارجح السبب لحدوث ذلك لـ
" لقافتي المعتادة " ^_^ اما الأخرى تمام ..
ولكن رغم اختلاف الكيكات الا ان الكريما اعطت النتيجة المُرضية لكلا
الكيكتين وهذا اللي خلاني ما اندم ولأول مرة على لقافتي ..
" الكريما كونها سكرية غطّت على الطعم المُـر للكيكة "
بشكل عـام ..
كل ما اردت اظهاره بالكيكة سواء كان شكلياً ولا طعمياً .. تم اظهاره
على أفضل ما يكون
Happy Birthday To Me
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.