Simple Vanilla cookies

مضى وقت طويل من آخر مرة سويت كوكيز

لأني وعدت نفسي اني ما راح اسوي كوكيز الا اذا الرطوبة الجوية خفّت شوي ^_^

يكفي بالمرات اللي سوّيت فيهاالـ كوكيز .. كان الزبد مسكين يصيح ويبكي ويتعذب بداخل الكوكيز

وطبعاً الوعد اتنفّـذ حرفيّـاً بعد سالفة كوكيز الضّخ اللي كان يـرجف رجفـاً بوقت الحر والرطوبة " هل تذكرونه ؟! " ههههه

المهم ..

بعد مرور هالوقت الطويل ... جى وقت تنفيذ كوكيز الضّخ اللي اخترب بذاك الوقت حتى اشوف وين كان الغلط

فقررت اني اخلّي الزبدة بحرارة الغرفة لـ 30 دقيقة وبعد هالمدة اجـي اتفحصها واشوف اذا كانت بالملمس المناسب للعمل فيها .. وكانت بحال ممتازة وارتأيت ان من الأفضل ابلّش تحضير الكوكيز بهـا اللحظة تماماً

وتم العمل ..

وها نحن نصل لمرحلة اضافة الطحين & اللوز المطحون

" كنت متوترة وايد .. لأن هذي هي المرحلة اللي اخترب فيها الكوكيز سابقاً .. "

واثناء خفق المكونات الجافة بالخليط الكريمي .. حصلت على عجينة طرية وقابلة للتشكيل بكيس الضّخ

وهذا اللي كنت ابحث عنه بالضبط .. طبعاً استانست وايد لأن عرفت سبب مشكلة خرب الكوكيز المرة السابقة

" وهو ان الزبدة بالمرة اللي فاتت كانت طرية وايد بسبب نسياني لها بحرارة الغرفة وقت أطول شوي .. بس هالمرة قررت اني انتبه ليها .. " و نجح الكوكيز ^_^

عشان شدي ....

" خلّوا بالكم على الزبدة ما تصير طرية وايد والا راح تحول عجينة الكوكيز إلى خليط دُهني بدل انّه يكون كريمي "

ونصيحة مهمة ...

اثناء وضع العجينة بكيس الضّخ .. مباشرة ضّخوا الكوكيز على الصينية وبشكل سريع وإلا الزبدة راح تسّلم عليكم وتخرب العجينة بشكل صادم  ^_^

الآن بالنسبة لوقت الخبز ...

استغرق الأمر عندي تقريباً 7 دقائق فقط ..

وبالنسبة لـ تبريد الكوكيز ..

تركته تقريباً 1 دقيقة يبرد بالصينية وبعدين نقلته لرف التبريد حتى يبرد بالكامل

و نصيحة اشاركم فيها .. من خلال ملاحظتي لها بـ الكوكيز

بمجرد ما يبرد الكوكيز انقلوه لعلبة محكمة .. وإلا راح يتحول من قوام هش إلى قوام ميت

" بمعنى راح تختفي الهشاشة اللي المفروض يكون عليها "

 و أخيراً ..

استمتعوا بتحضير ها الكوكيز "  السهل & الهش و الخفيف "  ^_^

Simple Vanilla cookies

المكونات :

لـ 24 كوكيز تقريباً ....

70 غرام طحين كيك ، منخول

25 غرام لوز مطحون

75 غرام زبدة غير مملحة ، بحرارة الغرفة

1 مح بيض ، بحرارة الغرفة

50 غرام سكر باودر

ربع ملعقة صغيرة معجون الفانيلا

" لا بأس بـ استعمال خلاصة الفانيلا في حال عدم توفر معجون الفانيلا "

ثمن ملعقة صغيرة ملح

التحضير :

1/ نسخن الفرن بدرجة 180 مئوية

2/ نبطن صينية خبز بـ ورق الخبز

3/ نخفق الزبدة & الملح حتى يصبح ناعم

4/ نضيف معجون الفانيلا ونخفق حتى يمتزج

5/ نضيف السكر الباودر ونخفق حتى يصبح فاتح اللون

6/ نضيف مح البيض ونخفق حتى يمتزج

7/ نضيف الطحين & اللوز المطحون ونخفق حتى يمتزج

8/ نسكب الخفيق إلى كيس ضخ مجهّز برأس محزّز

9/ نضخ الكوكيز على الصينية المحضرة

10/ نخبز لـ 12 – 15 دقيقة " يعتمد على حجم الكوكيز " أو حتى يصبح بني ذهبي

11/ نزيلهم من الفرن وندعهم ليبردوا على رف التبريد