مضى وقت شبه طويل من آخر مرة سويت
ماكرون ...
ولولا كثرت هاللوز المطحون .. ما
أعتقد كنت راح اسوي الماكرون بها الفترة ^_^
على كلاً ..
هالمرة صنعي للماكرون وراه سبب آخر
غير اللوز .. وهو اني من شهرين تقريباً شريت حصيرة الماكرون " اللي تجي
بأشكال دوائر & وبشكل قلب ودب "
اتذكر لما لقيتهم .. استانست وايد..
لأن كان نفسي اجرب الشغل فيهم واشوف الفرق وطبعاً ما قاومت ولذلك شريت الشكلين ...
وكان شرائي لهم كذلك لسبب " في حال
خلص ورق الـ parchment ما راح
احتار .. راح يكون عندي الحصيرة " ^_^
الآن ..
جى الوقت اللي اجرب فيه هالحصيرة ..
بعد انتهائي من تحضير خليط الماكرون حطيته بكيس
الضخ وبلّشت اضخ بالقوالب " اخترت الحصيرة اللي فيها الدوائر .. وكان اختيار
عشوائي .. للتجربة "
لما ضخيت .. حسيت ان الخليط تسطّح
وايد وما عجبني الأمر .. ولكن واصلت للنهاية
الشي اللي ضايقني ..
" ان المفروض استعمالي لها الحصيرة راح
يكون تجربة .. بمعنى اني اضخ الخليط في بضع دوائر مو كامل الحصيرة .. ولكن ما ادري
شـ اللي صار وخلاني انسى هالشي وضخيت بكامل دوائر الحصيرة ..
ولما بقى من الخليط شوي .. تذكرت اني
المفروض اضخ الخليط على ورق الـ parchment بالبداية وما سيتبقى من
الخليط راح يكون بدوائر الحصيرة السليكونية ..
لكن حصل العكس و ضخيت بقية الخليط
على ورق الـ parchment ...
الزبدة يعني ... " الخلاصة
"
ان النتيجة بالحصيرة الماكرونية
" عجبتني هالكلمة ^_^ "
ما كانت مرضية على الاطلاق .. طلعوا
الماكرونات مسطحين وايد ومقرمشين " ما ادري شلون حتى اوصفهم "
احبطت وايد وتضايقت وشوي وكنت راح
اقاتل هالـ ماكرونات ...
وصار موضوع الماكرونات اللي بـ
الحصيرة السليكونية " نهايات حزينة " هههههههه
زين كان عندي كم ماكرونـه ضخيتهم على
الورق ... " وإلا ما كان في تصوير " ^_^
وهذا كان درس قاسي وتعلمت منه "
ان خليني على ورق الـ parchment ومع السلامة ايتها الحصيرة الماكرونية " هههههه
واني اقول ليش مالي مزاج اصور واني
ضاختهم بالحصيرة .. اتاري النهايات الحزينة كانت جاية بالطريق ^_^
على كلاً ..
الماكرونات الحلوين اللي طلعوا على
المزاج .. كان لابد من اني اعمل ليهم حشو يليق فيهم
فـ اخترت اني اسوي كريما الزبدة
الفرنسية واضفت ليها برالينيه ...
وبالنسبة للماكرون .. فـ اعتقد ان
راح يمر وقت طويل لين افكر مرة ثانية اسويه وما ادري اذا راح استعمل الورق فقط ولا
راح ارجع اجرب الحصيرة مرة ثانية ؟!
اتمنى اني اظل على فكرة الورق ^_^
المكونات :
قشرة الماكرون :
2 بياض بيض كبير بحرارة الغرفة
التحضير :
1/ نسخن الفرن بدرجة 350 فهرنهايت
2/ نبطن صينية الخبز بورق الـ parchment
ونجهز كيس ضخ برأس عادي " حوالي 2 سم "
3/ نطحن مع بعض ، السكر الباودر
& اللوز المطحون ، الكاكاو حتى لا يكون لدينا كُتل
3/ بالخلاط ، نخفق بياض البيض حتى يرتفعوا
ويحافظوا على شكلهم
4/ مع مواصلة الخفق ، نضيف السكر
الحبيبات بالتدريج حتى يصبح صلب وثابت
5/ بحذر ، نطوي المكونات الجافة على
دفعتين مع بياض البيض المخفوق بـ السباتولا ، وعندما يصبح الخفيق ناعم ولا يوجد
شرائط من بياض البيض نوقف الطوي ونكشط الخفيق بداخل كيس الضخ
6/ نضخ الخفيق على الصينية المحضرة ،
مع ترك مسافة بين كل قطعة
7/ نطرق الصينية بضع دقائق بحزم على
سطح العمل لتسطيح الماكرون
8/ نخبز لـ 15 – 18 دقيقة ثم ندع قطع
الماكرون ليبردوا بالكامل على صينية الخبز ، ثم نزيلهم من الورق
9/ نحشي بـ الكريما المرغوبة
10/ نستطيع حفظ الماكرون بعلبة محكمة
لمدة أقصاها 5 أيام
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.