من يومين .. قررت اسوي كوكيز
" الوصفة مكوناتها قليلة ..
والتحضير سريع وما يحتاج لا معدات مطبخية ولا دقة "
وطبعاً .. كانت وصفة تناسبني لاني ما
كنت ارغب اني اطول بالمطبخ ولا استعمل الخلاط
وجهزت طاسة ومخفقة وملعقة .. وركنت
المكونات على الطاولة حتى ابلّش
والجو كان حار وجاف .. لدرجة ما
مداني اطلع الزبدة الا ومـاتت مباشرة
اني ما شفتها شدي الا واني قايلة
" النهايات الحزينة جاية بالطريق " ههههه
ومع ذلك .. اصرّيت الا اسوي هالكوكيز
..
المهم حطيت اول مكونين وخفقت .. لقيت
تمام ماشي الحال فـ قلت اكمل
نخلت المكونات الجافة وبعدين ضفتهم
للمكونين السابقين ومزجت المكونات
بالبداية لقيت الخليط صاير عجيب .. ثخين
ومو ناعم
" للمعلومية " ...
الكوكيز اللي كنت اسويه ضروري ينحط
بكيس ضخ والمفروض يكون ناعم حتى يسهل ضخه ... اللي حصل مع الكوكيز عكس العملية
اللي المفروض يكون عليها .. اني لقيته سميك ومتفكك والشوي والزبدة تدمع فيه ^_^
عـصّـبت وانزعجت وايــد لاني عرفت ان
هذي هي النهاية اللي كنت حاسة راح تصير : (
المهم .. شوفوا وش سويت
سويت موقف سخــيف .. المفروض حتى ما
يكون في بالي .. اني ما ادري حتى كيف صار في بالي ؟!
عشان اصلّح هالكوكيز العجيب .. قررت
استعمل ملعقة متوسطة من خلاصة الفانيلا
" على اساس يصير طري .. وطبعاً
واني حاطتها عارفة ان هذا الشي المفروض ما اسويه لاصلاح شي اخترب
خلاصة فانيلا ؟!!! كنت افكر فـ شنو
؟!!! ^_^
وطبعاً ..
فشل × فشل × فشل
اكيد ما راح يتصلح شي من هالكوكيز ..
اصلاً حتى زاد الأمر عن حدّه هههههه
وكملت المهمة " مصمّمة الا
واكمّـل "
حطيته بكيس الضخ واستعملت رأس ضخ
صغير
" يعني كلّش بينضخ بعد ..
" هههههههه
واني اضخ .. من ثقل العجينة الكيس
بنفسه تمزّق
ومو هني الشي اللي يضايق .. اللي
ضايقني غير ان العجينة فشلت رغم بساطتها هو لما ضخيته ولقيته يطلع من رأس الضخ
بشكل خيوط يتراجفوا ...
كل هالتقلبات الجوية ... وهم
يتراجفوا .. اني فـ وين وهم في وين هههههههه
بعدها .. هني عن جد عصّبت واكتفيت
شان ارميه .. واشيل الاغراض وانظف
الطاولة واني متضايقة
وقررت اني ما راح اسوي كوكيز بها
الفترة .. وطبعاً مما لا شك فيه اني راح اعيد اسوي هالكوكيز
واشوف الغلط وين كان " تقلبات
الجو اللي موتت الزبدة ولا الوصفة نفسها " ^_^
على كلاً ..
بعد هالفشل اللي صار .. قررت اني راح
اسوي شي ماله أي شأن بالحلويات
" حتى انسى هالكوكيز" فـ
اخترت وصفة كان نفسي اجربها من فترة وجى وقتها
الطبق بسيط وحتى المكونات قليلة ..
بس حتى الوصفات البسيطة والسريعة نتائجها دائماً تكون مرضية
بكل الأحوال ..
الوصفة البطاطيــة " عجبتني
وايــد " ^_^
تحتاج تابل Sichuan
.. اني
عملت بحث صغير حتى اشوف بديل اله
لقيت ان ماله بديل .. لان النكهة
فريدة وما تتبدل باي نوع تابل .. ولقيت 1% يقولوا يمكن الهيل أو الفلفل الأبيض يستعمل كبديل
المهم .. اني قررت اني بما اني ما لقيته
.. الغيـه ولا استبدلته لا بالهيل ولا بـ الفلفل
الأبيض
وتم تنفيذ الوصفة ..
وفعلاً وبكل صدق .. رغم بساطتها الا
انها تستحق 10 / 10
نصيحة ع السريع ...
ضروري تقدموا هالطبق البطـاطي مع
البيضة المقلية " الطعم رهيب لما يتمازجوا "
المكونات :
لـ 3 أطباق تقريباً "
" تقريباً 6 بطاطا متوسطة
"
4 ملعقة كبيرة زيت نباتي
2 فص ثوم ، مقطع ناعم
1 ملعقة كبيرة كاري
نص ملعقة صغيرة كركم
ربع ملعقة صغيرة تابل Sichuan
ملح & فلفل أسود مطحون حديثاً
مقدار كفّـة اليد ، أوراق بقدونس مقطعة
التحضير :
1/ نضع قدر به ماء & ملح على النار
وندعه ليغلي على حرارة عالية ، بعدها نضيف قطع البطاطا ، نغلي ببطئ على نار هادئة ونطهو
لـ 13 دقيقة أو حتى يطرى
2/ نصفي قطع البطاطا بمصفاة وندعها لتبرد
لبضع دقائق
3/ بمقلاة غير لاصقة على حرارة متوسطة
– عالية ، نسخن 2 ملعقة كبيرة زيت ثم نضيف الثوم & الكاري & الكركم &
تابل Sichuan ونطهو لـ 30 ثانية ونحرك
باستمرار
4/ نضيف الزبدة وحالما تذوب نضيف 1
ملعقة كبيرة زيت & قطع البطاطا المسلوقة ونقلي لـ 5 دقائق ونقلّب بأغلب
الأحيان
5/ نرش بالملح والفلفل الأسود ونقلّب
سوية لـ 1 دقيقة أخرى ثم نبعده عن الحرارة
6/ نضيف البقدونس ونقلّب ليمتزج
7/ نقسّم البطاطا بين الأطباق
8/ بمقلاة غير لاصقة ونظيفة ، نضيف 1
ملعقة كبيرة زيت ونضعها على حرارة متوسطة – عالية
9/ حالما يصبح الزيت حار نقلي البيض
لـ 2 – 3 دقائق حتى يطهو
10 / نضع البيضة المقلية فوق قطع
البطاطا ويقدم
Enjoy
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.