Totoro Birthday Cake

و اخيرا ..

" جى وقت تحضير كيكة الميلاد "

أووو صارلي فترة ما عملت كيكة عيد ميلاد .. آخر مرة كانت لأخوي الصغير وتقريبا مرت سنتين عليها

ومن بعدها ما حصلت لي فرصة اسوي أخرى 

على كلاً ..

صحيح تأخرت بتحضير كيكة ميلادية أخرى من وقتها ولكن عدت من جديد للتحضير

و أن تصل متأخراً خير من ان لا تصل والا شـ تقولون ؟!

هالمرّه ..

الكيكة الميلادية لأختي .. وبعد تفكير ليس بمطول أختارت شخصية توتورو حتى اسويها الها

واني انبسطت وايد باختيارها .. بالنسبة لي ما سبق وسويت كيكة بشكل وأختي باختيارها الحكيم عطتني الفرصة حتى اجرب مهاراتي ^_^

اخترت كيكة الشوكولا الأبيض للتحضير .. وتم التحضير قبل بيوم من التقديم

" هالكيكة طعمها رهيب ولا كأن الشوكولا الابيض يدخل من مكوناتها .. خفيفة جداً ولذيذة "

حضّرت العجينة الفوندنتيّة كذلك قبل بيوم .. حتى اسهل المهمه عليي مرة وحدة

بالنسبة للتثليجة ..

اخترت تثليجة شوكولا البندق .. اختياري كان سريع بدون تفكير بس اثمر بفائدة

" جدا لذيذة ولا تقاوم كأنها آيس كريم بالشوكولا " ^_^ وتم تحضيرها باليوم اللي قدمت فيه الكيكة

والحين نجي للتشكيل والتغطية الفوندنتيّة :

كل شي مر بخير ولله الحمد إلى ان نسيت الورقة اللي تصير فوق راس توتورو ..

قعدت اتأمل احس في شي ناقص بالكيكة .. والا اللي هي الورقة ( وي نسيت اسويها واحطها على الراس )

ع السريع تم حل المشكلة واشوه ما قدمتها بدون الورقة " من دونها والله ما يسوى " ههههههه

بالنسبة للرضا بالكيكة ..

راضية عنها ومبسوطة وايد .. طلع بالشكل اللي حبيت اطلعه فيه ويا حليلة ( خشمه .. يجنن وهو منتفخ والحمد لله ما اخترب )  هو اللي مخلّنه  SO Kawaii ^_^

طبعاً مع الاصحاب المزغبين اللي باللون الاسود " هم المفروض يكونوا مزغبين " بس اني قررت اني اطلعهم بالشكل هذا شـ حلاتهم " يونسوو "

الشي اللي ضايقني ..

الايادي .. تسرعت بعملهم

" للدفاع عن نفسي ... انتبهت اني نسيت اسوي اياديه متأخر شوي فـ قررت اتليقف شوي واعمل الايادي ع السريع وهذا اللي صار "

عدا عن ذلك ..

كل شي مضبوط وتمام وطبعا راضيه عن النتيجة مثل ما قلت ..

وبالنسبة لـ أختي والكيكة التوتورية ..

الحمد لله شفت الفرحة باينه عليها .. وانبسطت وايد بالشكل النهائي وعجبتها الكيكة شكلاً ومضموناً ..

و بالنسبة لي ..

هذا شي لا يقدر بثمن واعتبر ان المجهود ما راح سدى ^_^