كان يا ما كان ..
من فترة طلب مني اخوي الصغير اني
اسوي له المشاكس والمجنون " Taz " ..
شلون بلّشت الحكاية ... !
كنت قاعدة اسوي Taz " لـيّي " .. وعجبه وايد ومن كثر ما
حبّه بدون تردد قالي ممكن تسوي لي انا بعد ؟
واني على طول رديت " لا .. مستحيل
"
حاول ويايي .. وقالي انه راح يدفع لي
القيمة اللي احطها على الشغل النهائي .. ومع ذلك رفضت مرة ومرتين وامرار
لأن .. بالوقت اللي كنت اسوي هـالـ Taz صادفتني عدّة عقبات في الباترون
جزء كان خاطئ وجزء كان ناقص .. وكان
انهاء العمل فيه مستحيل ..
حتى اني ما صدّقت انّي حلّيت مشكلة
الاخطاء وملأ النقصان فيه ..
فـ بالتالي .. يجي اخوي ويطلب مني
اعيد اسوي واحد ثاني وبوقتها كنت توني مخلصته .. كان من المستحيل اني انفذه مباشرة
..
المهم ..
لقيت ان اخوي زعل .. " يــا
حليله " هههههه
فـ قررت اني انتقل للخطة " B
" وهي اني اسوي له سلفستر بدل هـالـ Taz
وقلتله .. اني مستعدة اسوي سلفستر
وغير شدي لا ..
زين وافق .. مع ان ملامحه تقول العكس
..
بلّشت الشغل فيه وعلى بالي خلاص راح
انهيه فـ أسبوع .. اتاري حتى باترون سلفستر فيه عقبات
عاد هني .. حسيت بالقهر والعصبية في
وقت واحد ..
" وش اللي خلاني افكر اسويه ؟!
اعتقد اني راح اوقف الشغل فيه .. وراح آخذ استراحة قصيرة وبعدها اعيد اسوي Taz ثاني وانتهينا " هذا كان كلامي بالوقت اللي
كنت اشتغل فيه ...
بس بعدها قررت اهدّي نفسي .. وافكر
بـ حل لها الباترون ..
أمّا اني اتركه وانسحب من الشغل من منتصفه ما
لازم يكون وارد بالاحتمالات ..
على كلاً ..
قضيت اسابيع .. بين اشتغل وبين اوقف الشغل
وافكر بطريقة الغرز وكيف ووين لازم تكون كل غرزة طبعاً مع التفكير بعددهم ..
بعد فترة شوي طويلة من التصحيح والتعديل
والشغل .. انهيت الاجزاء ولكن ما صارت لي الفرصة انّي اخيطهم مباشرة
بعد كل هذا ..
صادف عيد ميلاد اخوي ..
وكنت حابة لو اعطيه سلفستر بنفس اليوم
.. ولكن ما خلصت منه بعدني .. فـ كان عملي للكيكة بذاك الوقت هو الأحل الأنسب .. والى
حين انتهائي من سلفستر اعطيه اياه " عادي وين المشكلة في التأخير " هههههه
بعدها ..
جى الوقت المناسب حتى اخيط الاجزاء ببعضها
وانهي الشغل واخلص ..
صراحة ما توقعت اني راح اُعجب بـ
سلفستر .. حبّيته لدرجة ان شوي واغير رايي وآخذه ليي ^_^
على كلا ..
وصلنا للزبدة " الخلاصة " ..
قررت اني اعطي اخوي سلفستر كـ هدية
مجانية بسبب تأخري في انهائه" هالمرّه هذي بس " هههههه
حطيتها بعلبة تليق بمستواها ..
وقدّمتها له متبوعة بكلمة " هالمرّة اعطيك اياه هدية .. مرة ثانية كل شيء
بحسابه " ههههههه
والأهم من كل هذا " عجبه سلسفتر
ونسى Taz "
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.