◕‿‿◕ let it be cute

ماني عارفه وش أقول أو من وين أبدأ حتى ؟!

بس اللي اقدر اقوله انّي حضيت " بـ الكثير من المتعة " اثناء تحضيري لها الكيكة

شي طبيعي كل سنة اشعر بتوتر اثناء قرب اعياد الميلاد " سواء عيد ميلاد اختي أو اخوي "

واكون في دوامة من الحيرة بخصوص الكيكة اللي راح اسويها & التغطية & اللمسة النهائية

واحاول اجمع أفكاري و أعمل تصوّر لـ طعم الكيكة مع التغطية بجانب طبعاً الشكل النهائي

لأن لو ما ربطنا هالعناصر الثلاثة ببعضهم من البداية  .. راح يكون كل اللي سويناه " مجهود ع الفاضي "

الآن بالنسبة لها الكيكة ..

قبل أسبوعين من عيد ميلاد أخوي .. كنت محتارة وايد

في النكهة اللي راح تكون خاصة بالكيكة & التغطية المناسبة لها & الشكل النهائي

" من المهم عندي ان تكون الكيكة طعم وشكل مثيرة للدهشة .. وعشان شدي آخذ وقت طويل وايد في التفكير قبل البدء بأي خطوة مهما كانت صغيرة أو كبيرة "

المهم خلني اكمل السالفة ..

حطيت ببالي عدة نكهات للكيكة اللي راح اسويها واخترت التغطية الكيكوية ولما جيت لـ الشكل النهائي .. وقفت وايد عند هالنقطة ..

مرّه اشعر ان الشكل النهائي راح يكون مبالغ فيه ومرّه اشعر ان الأمر مو ضابط بالمرّه .. فكان لابد من مشاركة أختي في الأمر واشوف آرائها

و أعجبت أختي بأحد أفكار الكيكة اللي حطيتهم ببالي .. فـ قررت امشي بالأمر يوم تنفيذ الكيكة .. رغم اني بعدني مازلت ماني مقتنعة ...

المهم وصلت لآخر يومين قبل لايصير عيد ميلاد أخوي ..

وفجأة غيرت كل الخطط والأفكار اللي حطيتهم ببالي ..

عرفت وش النكهة اللي راح تميز الكيكة & التغطية المناسبة & و أخيراً اللمسة النهائية

فـ قلت لأختي اني كل شي حطيته ببالي بها الأسبوعين قررت الغيه نهائياً لعدم اقتناعي ..

وقلت ليها عن اللي راح اسويه فقالت لي " انها متحمسة وايد لفكرة الكيكة وانها راح تنطر يوم التنفيذ "

قراري كان للكيكة ..

الكيكة .. راح يكون من ضمن مكوناتها الشوكولا البيضاء المذابة & كريما الخفق & الكريما الحامضة

" ما ادري بس حسّيت هالكيكة راح يكون الها طعم رهيب ^_^ "

التغطية .. أخترت كريما الزبدة بالميرنغ السويسري الممزوجة بالأوريو

" حسيتها تغطية مناسبة للكيكة اللي راح اسويها "   

الشكل النهائي .. قررت اني راح اسويه بالفوندنت

وحطيت ببالي الشكل " Smores " واللي هو عبارة عن " لوح بسكويت & مارشملو & لوح شوكولا " وطبعاً راح يكون بشكل ظريف وراح يتم عمله من الكيكة نفسها

فكان قراري ..

انّي راح اسوي عجينة الفوندنت & الكيكة قبل بيوم واليوم الثاني واللي هو راح يكون فيه تقديم الكيكة

" احضّر كريما الزبدة & تغطية الكيكة بالفوندنت "

فكان التنفيذ كما خُطّط له ..

واخيراً وصلنا لليوم اللي راح اغطي الكيكة بالكريما والفوندنت ..

هذا كان اليوم اللي شعرت فيه بمتعة كبيرة رغم انه كان اطول و اتعب يوم قضيته بالمطبخ

إلى ان انتهيت من الكيكة و أخيراً ..

جى وقت اني احافظ عليها لين اللحظة اللي راح اقدمها كـ هدية .. لما جيت احملها كانت ثقيلة وايد اكثر مما تصورت وطوال الوقت واني خايفة توقع واخسرها ويروح التعب ع الفاضي ..

لكن الحمد لله .. كل شي سار مثل ما اردت .. وحسيت بسعادة كبيرة لما لقيت أختي مبسوطة بالشكل النهائي وتقولي انها " تشعر بالغيرة " وتتمنى لو هذي الكيكة الها

" وعدتها اني راح اسوي ليهاأحلى كيكة لما يجي وقت عيد ميلادها " ^_^

و الآن " اللحظة الحاسمة "

تــرا رااااااااا " تشويق " ^_^

حطيت الكيكة على الطاولة .. وخليت اختي تنادي على أخوي ..

لما دخل المطبخ .. قلت له وش رايك بها الكيكة؟! ..

 ابتسم وقال " حليوه " وطلع من المطبخ حتى قبل لا اقوله ان هذي الكيكة تخصه..

صراحة احبطت وايد .. " كل ها التعب وتقول لي " حليوة مع ابتسامة وتطلع قبل لا انهي المفاجأة .. شي مثير للدهشة  " ؟!

على فكرة ..

مو بس اني اللي شعرت باحباط .. حتى أختي "

اختي لما شافتني محبطة وعلى وشك البكاء قالت لي انها راح تقوله عن سبب هالأسلوب السريع .. بس اني طلبت منها ما تقوله

المهم ..

 بما انه طلع قبل لا انهي سالفتي قررت أأجل تقديم الكيكة لبعد كم ساعة واشوف ..

وجى الوقت الثاني ورديت طلبته وقدمتها اله وقلنا له اني واختي ان هالكيكة " كيكة عيد ميلادك "

ابتسم وقال : حسيت ان في شي عجيب صاير

" كان يشعر بغرابة الأمر .. لأن اليوم اللي كنت احاول انهي الكيكة فيه ما سمحت له يدخل المطبخ لا من قريب ولا من بعيد نهائياً " ههههه

وقلت له : الحين اني حاطه فيها مجهود ووقت وكل اللي قلته " حليوه وطلعت من المطبخ " ؟!

الا يقول :

كنت يوعان " جوعان " وعشان شدي ما خذت في بالي يعني .. يا حليـله ^_^

ثاني يوم من تقديم الكيكة ..

قالي ان الكيكة كلها عجبته .. طعماً وشكلاً وظل يشكرني يومين تقريباً

" تمام ان اختياري كان في محله من كل النواحي بخصوص هالكيكة "

الكيكة .. خفيفة وطعمها لذيذ

التغطية الأوريوية .. كأنها آيس كريم " لا تقاوم "

الفوندنت .. هذا اللي عطى الطعم الخيالي للكيكة

وهكذا ..

تم انجاز المهمة بنجاح ^_^